TCAA NA UMOJA WA ULAYA WATHIBITISHA DHAMIRA YA KUIMARISHA USIMAMIZI WA USALAMA WA USAFIRI WA ANGA

Mkurugenzi Mkuu wa Mamlaka ya Usafiri wa Anga Tanzania (TCAA), Dkt. Jabiri K. Bakari, amethibitisha dhamira ya Mamlaka hiyo ya kujenga Mamlaka ya Usafiri wa Anga ya kiwango cha kimataifa barani Afrika, yenye matarajio ya kufikia viwango vinavyolingana na mamlaka za usafiri wa anga za Ulaya katika ubora wa udhibiti, umahiri wa kitaalamu, ufanisi wa kiutendaji na usimamizi wa usalama wa anga.

Alitoa kauli hiyo wakati wa kikao cha kuhitimisha ujumbe wa wataalamu wa msaada wa kujengeana uwezo kutoka Shirika la Usalama wa Anga la Umoja wa Ulaya (EASA), kilichofanyika tarehe 3 Septemba 2026 katika Makao Makuu ya TCAA jijini Dar es Salaam. Dkt. Bakari aliushukuru Umoja wa Ulaya kwa kuendelea kutoa msaada na kuonyesha imani katika maendeleo ya Tanzania. Pia alieleza juhudi zinazofanywa na TCAA kuimarisha mifumo yake ya usimamizi, ikiwemo uundaji na utekelezaji wa Mfumo wake wa ndani wa TCAA wa Huduma za Usafiri wa Anga (Civil Aviation Services Portal – CASP), ambao ulipewa pongezi na timu ya EASA.

Mkurugenzi Mkuu wa Mamlaka ya Usafiri wa Anga Tanzania (TCAA), Dkt. Jabiri K. Bakari akizungumza   wakati wa kikao cha kuhitimisha ujumbe wa timu wataalam kutoka  Shirika la Usalama wa Anga la Umoja wa Ulaya (EASA)

Timu ya EASA ilieleza kuridhishwa kwake na maendeleo na juhudi zilizooneshwa na TCAA wakati wa ziara hiyo ya siku tatu. Aidha, timu hiyo ilitambua maendeleo yaliyofikiwa na kuhimiza TCAA kuendeleza kasi katika kushughulikia masuala yote muhimu ya usimamizi wa usalama wa anga.

Kwa upande wake Mkuu wa Ujumbe wa Umoja wa Ulaya alithibitisha dhamira ya EU ya kuendelea kuisaidia Tanzania kupitia msaada wa kitaalamu, mbinu za utekelezaji wa vitendo na kubadilishana ujuzi. Aidha, alieleza kuwa Umoja wa Ulaya umetenga Euro milioni 2 kwa ajili ya msaada unaohusiana na kuboresha zaidi Masuala ya usafiri wa anga nchini. 

Kiongozi wa Ujumbe wa EASA Bw. Jose Miguel Manso Angulo akizungumza wakati wa kikao hicho

Ujumbe wa EASA uliongozwa na Bw. Jose Miguel Manso Angulo akiambatana na Bw. Gustavo Juan Roman Barba na Bw. Antonio Portales Pelaez.

Ujumbe huo, uliopo nchini kwa siku tatu kuanzia tarehe 1 hadi 3 Septemba 2026, ulifuatilia maendeleo ya Nchi (State) katika utekelezaji wa hatua za marekebisho pamoja na kuimarisha usimamizi wa usalama wa Usafiri wa anga. Majadiliano yalihusu maeneo ya ki sheria, muundo wa taasisi, uchunguzi wa ajali ndege, utoaji wa leseni kwa eneo la rasilimali watu la Usafiri wa anga, ubora wa ndege kwa matumizi (airworthiness) na uendeshaji wa ndege, pamoja na kufanya vikao na waendeshaji wa mashirika ya ndege kuhusu hoja zilizobainishwa, Mipango ya Hatua za Marekebisho (Corrective Action Plans) na ufuatiliaji wa utekelezaji wake.

Ujumbe huo ni sehemu ya juhudi zinazoendelea za Tanzania za kuimarisha usimamizi wa usalama wa Usafiri wa anga na kuonesha maendeleo endelevu kuelekea kutimiza matakwa ya kuondolewa kwenye Orodha ya Usalama wa Anga ya Umoja wa Ulaya (European Union Air Safety List).

Read More

TCAA KUWAHUDUMIA WATEJA WAKE KIMKAKATI

 Mamlaka ya Usafiri wa Anga Tanzania (TCAA) imeendelea kuimarisha utoaji wa huduma kwa wananchi na wadau kupitia Dawati la Huduma kwa Wateja, hatua inayolenga kurahisisha upatikanaji wa taarifa, kupokea maoni na kuhakikisha huduma zinatolewa kwa haraka na kwa ufanisi.

Akizungumza katika Banda la TCAA kwenye Maonesho ya 50 ya Kimataifa ya Biashara ya Dar es Salaam (Sabasaba), Afisa wa Dawati la Huduma kwa Wateja, Bw. Rashid Mngoya, alisema dawati hilo limeanzishwa ili kuwa kiungo kati ya Mamlaka na wananchi kwa kuwapatia taarifa sahihi kuhusu huduma mbalimbali za usafiri wa anga.

Alieleza kuwa kupitia dawati hilo, wadau wanaweza kuuliza maswali, kuwasilisha maoni, kutoa mapendekezo au changamoto wanazokutana nazo, pamoja na kupata mwongozo kuhusu taratibu mbalimbali zinazosimamiwa na TCAA.

Kwa mujibu wa Bw. Mngoya, uwepo wa dawati hilo unaimarisha mawasiliano kati ya TCAA na wateja wake, huku ukihakikisha hoja na malalamiko yanashughulikiwa kwa wakati ili kuongeza ubora wa huduma zinazotolewa.

Alisisitiza kuwa TCAA itaendelea kuboresha huduma zake kwa kuzingatia viwango vya kitaifa na kimataifa katika usalama, ulinzi na utoaji wa huduma bora kwa wadau wote wa sekta ya usafiri wa anga.

Kwa upande wake, Meneja Uhusiano wa TCAA, Bw. Ally Changwila, alisema Mamlaka imefanya maboresho mbalimbali katika mifumo yake ya mawasiliano ili kuwafikia wananchi kwa urahisi zaidi. Alitaja mojawapo ya maboresho hayo kuwa ni tovuti ya TCAA ambayo sasa inapatikana kwa lugha ya Kiswahili na Kiingereza, ikiwa na taarifa zilizoboreshwa na sehemu maalum ya Maswali Yanayoulizwa Mara kwa Mara (FAQs) ili kuwasaidia watumiaji kupata majibu ya haraka kuhusu huduma mbalimbali.

Kupitia ushiriki wake katika Maonesho ya Sabasaba, TCAA inaendelea kutoa elimu kwa umma kuhusu majukumu yake ya kiudhibiti, haki na wajibu wa abiria, matumizi salama ya ndege zisizo na rubani (drones), pamoja na huduma nyingine zinazohusiana na sekta ya usafiri wa anga.

Hatua hizi zinaonyesha dhamira ya TCAA ya kuendelea kuboresha huduma kwa wateja, kuimarisha mawasiliano na wadau na kuongeza uelewa wa umma kuhusu mchango wa Mamlaka katika kuhakikisha sekta ya usafiri wa anga nchini inaendelea kuwa salama, yenye ufanisi na kuendana na viwango vya kimataifa.

Read More

TANZANIA NA UBELGIJI WATIA SAINI HATI YA MAKUBALIANO YA BIASHARA YA USAFIRI WA ANGA

 

Waziri wa Ujenzi na Uchukuzi Mhe. Prof. Makame Mbarawa akizungumza wakati wa hafla ya utiaji saini hati ya makubaliano ya kibiashara ya usafiri wa anga kati ya Tanzania na Ubelgiji.

Balozi wa Ubelgiji nchini Balozi, Peter VAN ACKER akisisitiza umuhimu wa ushirikiano huo wakati wa hafla ya utiaji saini hati ya makubaliano ya kibiashara ya usafiri wa anga kati ya Tanzania na Ubelgiji.

Kaimu Katibu Mkuu Wizara ya Ujenzi na Uchukuzi (Sekta ya Uchukuzi) Mhandisi. Aron Kisaka akisioma taarifa ya ushirikiano baina ya Tanzania na Ubelgiji  katika hafla ya utiaji saini hati ya makubaliano ya kibiashara ya usafiri wa anga kati ya nchi hizo mbili.

Mkurugenzi Mkuu wa Mamlaka ya Usafiri wa Anga Tanzania (TCAA) Hamza S. Johari akisisitiza jamba wakati hafla ya utiaji saini hati ya makubaliano ya kibiashara ya usafiri wa anga kati ya Tanzania na Ubelgiji.

Waziri wa Ujenzi na Uchukuzi Mhe. Prof. Makame Mbarawa (Kulia) na Balozi wa Ubelgiji nchini Balozi,  Peter VAN ACKER (Kushoto) wakitia saini hati ya makubaliano ya kibiashara ya usafiri wa anga kati ya nchi hizo mbili.

Waziri wa Ujenzi na Uchukuzi Mhe. Prof. Makame Mbarawa (Kulia) na Balozi wa Ubelgiji nchini Balozi, Peter VAN ACKER (Kushoto) mara baada ya kusaini hati ya makubaliano ya kibiashara ya usafiri wa anga kati ya nchi hizo mbili.

Waziri wa Ujenzi na Uchukuzi Mhe. Prof. Makame Mbarawa na Balozi wa Ubelgiji nchini Balozi,  Peter VAN ACKER wakiwa katika picha ya pamoja na wadau wa sekta ya Anga mara baada ya kusaini hati ya makubaliano ya kibiashara ya usafiri wa anga kati ya nchi hizo mbili.

Na Mwandishi wetu

Waziri wa Ujenzi na Uchukuzi Mhe. Prof. Makame Mbarawa amesaini makubaliano ya kibiashara na Balozi wa Ubelgiji hapa nchini.

Makubaliano hayo yatawezesha huduma ya biashara za ndege kati ya Tanzania na Ubelgiji ambapo sasa ndege za Tanzania zitaweza kwenda moja kwa moja Ubelgiji na ndege za Ubelgiji kuja Tanzania.

Akiongea katika hafla hiyo iliyofanyika jijini Dodoma Prof. Mbarawa ameyataka mashirika ya ndege kuanza fursa hiyo muhimu ili kuwekeza na kuimarisha fursa za uchumi hususani katika nyanja za utalii na biashara.

“Huu ni mwanzo tu, tumejipanga kuhakikisha sekta ya usafiri wa anga inafunguka na kuwaleta wadau wengi wa maendeleo nchini na sisi kutoka kwenda kuangalia fursa huko ziliko”. amesisitiza Prof. Mbarawa.

Naye Balozi wa Ubelgiji hapa nchini Balozi, Peter VAN ACKER amesema chini ya mpango huo, ndege za Tanzania zitakwenda moja kwa moja Ubelgiji na ndege kutoka Ubelgiji zitakuja moja kwa moja Tanzania zikitua katika Viwanja vya Ndege vya Kimataifa vya Julius Nyerere (JNIA), Kilimanjaro (KIA)  na Abeid Amani Karume (AAKIA).

Kaimu Katibu Mkuu (Sekta ya Uchukuzi) handisi. Aron Kisaka ameeleza kuwa Wizara imejipanga kikamilifu kuhakikisha Tanzania inanufaika vyema na fursa zitakazotokana na makubaliano haya muhimu.

Naye Mkurugenzi Mkuu wa Mamlaka ya Usafiri wa Anga Tanzania (TCAA) Hamza S. Johari ameelezea kufarihishwa na makubaliano yaliyofikiwa na nchi hizi na kueleza kuwa Mamlaka ya Usafiri wa Anga nchini itaendelea kutafuta fursa kama hizi ili kuifungua Tanzania duniani.

Read More