MORRISON AIBWAGA YANGA CAS

MCHEZAJI wa Kimataifa wa Ghana anayecheza Klabu ya Simba, Bernard Morrison ameshinda kesi yake dhidi ya Yanga SC, kesi iliyokuwa ikisikilizwa na Mahakama ya Usuluhishi wa Michezo (CAS). Taarifa iliyotolewa na Mahakama hiyo imeeleza kuondoa rufaa iliyowasilishwa na Klabu ya Yanga dhidi ya Mchezaji huyo raia wa Ghana anayecheza nchini Tanzania.

CAS wameeleza kuwa kesi hiyo ilitolewa maamuzi na Kamati ya Sheria na Hadhi za Wachezaji ya Shirikisho la Soka nchini Tanzania (TFF) Agosti 12, 2020. Imeelezwa kuwa mkataba wa awali wa Morrison uliisha Julai 14, 2020, Morrison alilazimika kulipa kiasi cha fedha Dola za Marekani (USD 30,000) baada ya kushindwa kusaini mkataba wa pili na Yanga SC.

Yanga SC walipeleka suala hilo CAS wakidai kulipwa kiasi cha USD 200,000 baada ya Mchezaji huyo kuvunja mkataba na Klabu hiyo. Mahakama ya CAS ilikaa Julai 29, 2021 na kutupilia mbali rufaa ya Yanga SC ikidaiwa haina mashiko.

Read More

ROONEY AWEKA HISTORIA KWA KUFUNGA GOLI LA 200 EPL

Wayne Rooney ameandika historia kwa kuweka rekodi baada ya kufunga goli lake la 200 katika  Ligi Kuu ya Uingereza huku Raheem Sterling akifunga bao lililoiokoa Manchester City iliyobakia na wachezaji 10 na kuinyima Everton ushindi katika uwanja wa Etihad.

Manchester City walijikuta na kibarua kigumu baada ya Rooney kufunga goli na baada ya Kyle Walker kutolewa nje kwa kadi mbili za njano za haraka ndani ya dakika 44.

Kikosi hicho kinachonolewa na Pep Guardiola hakikuamini matokeo hayo na kilipambana mnono na kufanikiwa kuepuka kipigo cha pili nyumbani wakiwa chini ya Mhispania huyo.

   Mpira uliopigwa na Wayne Rooney ukiwa umempita tobo kipa wa Manchester City na kuandika goli 

   Raheem Sterling akiachia shuti na kuisawazishia Manchester City goli na kufanya matokeo kuwa 1-1

Read More

WAZIRI MWAKYEMBE AWAHAMASISHA WASANII WA MUZIKI KUANZISHA MFUKO WA WASANII

Waziri wa Habari, Utamaduni, Sanaa na Michezo, Dkt. Harrison Mwakyembe amewataka Wasanii wa Muziki wa Kizazi kipya nchini kuanzisha mfuko wa wasanii kwa lengo la kutatua changamoto ya udhamini inayowakabili.

Ameyasema hayo Jijini Dar es Salaam katika kikao kazi na Wasanii hao ambacho kilijadili changamoto mbalimbali zinazowakabili na namna ya kukabiliana nazo hivyo kuwataka kutokata tamaa

Amesema kuwa kutokana na malalamiko na changamoto mbalimbali zinazowakabili Wasanii, ambazo nyingi zinasababishwa na mikataba inayowanyonya Wasanii katika kazi zao, ni vema sasa Wasanii hao kupitia Chama chao cha Tanzania Urban Music Association (TUMA) kuanzisha mfuko ambao utakua unatoa mikopo kwa Wasanii ili kuwezesha utendaji wa kazi zao pasipo kutegemea wadhamini.

“Ninafikiri dawa tunayohitaji ni kuanzishe mfuko wa Wasanii ambapo kila Msanii atatakiwa kuchangia fedha. Jambo ambalo litawavutia wadau wengine kuchangia mfuko huo na kuwaondoa katika dhana ya utumwa, na mfuko huo utamsaidia msanii aliyejisajili kupata mkopo bila kutozwa riba yoyote,” alielezea Waziri Mwakyembe.

Aidha, Mwakyembe amesema kuwa Tasnia ya Sanaa ina mchango mkubwa katika kuongeza pato taifa hivyo ametaka tasnia hiyo kurasimishwa ili kupunguza tatizo la ajira na pia kutumika kama chombo maalumu cha kuielimisha jamii kwani kupitia Sanaa wananchi hupata ujumbe kwa urahisi.

Hata hivyo, Mwakyembe ameunda Kamati ya kushughulikia masuala yanayowakabili Wasanii ikiwemo sera na sheria ili kuboresha maslahi ya Msanii. Wasanii wanaounda Kamati hiyo ni Azma Mponda, Niki wa Pili pamoja na Witness Mwaijanga.

Kwa upande wake Kaimu Katibu Mtendaji wa BASATA, Onesmo Kayanda amesema kuwa, ili kuboresha na kukuza tasnia ya muziki nchini ni lazima kuwepo na soko la uhakika la kazi hizo pamoja na tuzo mbalimbali ambazo zitatumika kutia hamasa kwa wasanii.

Read More

MASHINDANO YA NDONDO CUP 2017 YAZINDULIWA JIJINI MWANZA

Kutoka kushoto ni Mwenyekiti wa Kamati ya Mashindano kutoka Chama cha Soka mkoani Mwanza MZFA Kess Mziray, Mratibu wa Mashindano ya Ndondo Cup Yahaya Mohamed, Meya wa Jiji la Mwanza James Bwire pamoja na Mwakilishi wa jeshi la polisi mkoani Mwanza, SP.John Kafumu.

Na George Binagi @BMG

Baada ya mashindano ya soka ya Ndondo Cup kufanya vizuri Jijini Dar es salaam kwa miaka mine sasa tangu kuanzishwa kwake, mashindano hayo pia yamezinduliwa katika Jiji la Mwanza kwa ajili ya kutoa fursa kwa vijana kuonesha uwezo wao wa kusakata kabumbu.

Mratibu wa mashindao hayo yalioanza kutimua vumbi mwaka 2014 baada ya kuasisiwa kwenye kipindi cha Sports Extra cha Clouds Fm, Yahaya Mohamed amezungumzia ratiba kamili ya kuanza kwa mashindano hayo Jijini Mwanza.

Uzinduzi wa mashindano ya Ndondo Cup 2017 mkoani Mwanza, mbele ya wanahabari ambapo timu shiriki zimetakiwa kujisajili kwenye ofisi za Chama cha Soka mkoani Mwanza MZFA

Kutoka kushoto ni ripota wa Clouds Fm Mwanza Fabian Fanuel, Mwenyekiti wa Kamati ya Mashindano kutoka Chama cha Soka mkoani Mwanza MZFA Kess Mziray, Mratibu wa Mashindano ya Ndondo Cup Yahaya Mohamed, Meya wa Jiji la Mwanza James Bwire pamoja na Mwakilishi wa jeshi la polisi mkoani Mwanza, SP.John Kafumu.

Read More

STARS YAVUNJA MWIKO DHIDI YA BAFANA BAFANA NA KUTINGA NUSU FAINALI COSAFA CUP

Mshambuliaji timu ya taifa ya Tanzania  na shujaa wa mchezo huo Elias Maguri akipambana na Beki wa Bafana Bafana Nurdin katika mchezo uliomalizika kwa ushindi wa goli moja kwa bila kwa Taifa Stars

 Picha na Mtandao

Taifa Stars imetinga nusu fainali ya michuano ya Cosafa baada ya kuwatwanga wenyeji Afrika Kusini kwa bao 1-0.

Shuja wa mechi hiyo ambaye pia ameibuka nyota wa mchezo huo amekuwa ni Elius Maguri ambaye amefunga bao hilo pekee katika kipindi cha kwanza.

Kipa Aishi Manula mara kadhaa alilazimika kuokoa michomo mikali ya washambuliaji wa Afrika Kusini.

Safu ya ulinzi iliyoongozwa na Erasto Nyoni na Salim Mbonde ilionekana kukaa imara tokea kipindi cha kwanza lakini Muzamiru Yassin na Raphael Alpha wakaonekana kufanya vizuri zaidi katika kuisadia timu wakitokea eneo la kati la uwanja huku Simon Msuva aliingia kipindi cha pili kuchukua nafasi ya Thomas Ulimwengu na kusaidia kuongeza nguvu ya kupandisha presha kwenye lango la Afrika Kusini.

Sasa Taifa Stars itaumana na Zambia katika mchezo wa nusu fainali siku ya Jumatano tarehe 5 Julai.

Read More

SHUGHULI ZOTE UCHAGUZI MKUU TFF ZAPIGWA "STOP" HADI JULAI 4

Kamati ya Utendaji ya Shirikisho la Soka nchini (TFF) imesimamisha shughuli zote za uchaguzi kuanzia jana Jumapili hadi Julai 4 ambapo watakaa kikao cha kamati hiyo na kutoa maamuzi yatakayofikiwa kuhusu mchakato huo.

Sababu kubwa imeelezwa kuwa ni wajumbe wa kamati ya uchaguzi ya TFF kukataa majina ya baadhi ya wagombea kwa sababu binafsi. 

Revocatus Kuuli ambaye ni Mwenyekiti wa Kamati ya Uchaguzi amesema kutokuwa na maelewano kumemsababisha achukue uamuzi wa kuuandikia barua Kamati ya Utendaji akiiomba isitishe mchakato wa uchaguzi (kwakuwa kanuni zilizopo zinamruhusu kufanya hivyo) japo kumekuwa na taarifa kuwa Bwana Kuuli alitofautiana na wajumbe wengine wa Kamati ya Uchaguzi kuhusu hatma ya Rais wa Shirikisho hilo, Jamal Malinzi ambaye alichukua fomu kutaka kutetea kiti chake.

Mgogoro uliosababisha kutoelewana huku umetokana na wajumbe wanne kati ya watano kutaka jina la Rais wa sasa, Jamal Malinzi, lipitishwe bila kuwapo – jambo ambalo Revocatus Kuuli anasema si sahihi kikanuni.

 Kamati ya Uchaguzi ya TFF ina wajumbe watano. Kwa sababu hiyo, Mwenyekiti wa Kamati ya Uchaguzi Mkuu wa TFF Revocatus Kuuli akaiandikia barua Kamati ya Utendaji ya TFF akitaka mchakato mzima wa uchaguzi usimamishwe na kuangalia kama Sheria za zoezi zima zinazingatiwa.

“Kikao chetu cha leo kimefanyika lakini hakijatoa maamuzi ya matatizo yaliyotokea jana.”

“Mimi kama Mwenyekiti wa Kamati nimechukua maamuzi ya dhamana niliyonayo. Nimemuandikia Katibu juu ya dhamira yangu kuangalia upya mwenendo mzima wa kamati. Wamekubaliana na maombi yangu na wamenipa barua kwamba wanaona sahihi mchakato mzima usimame mpaka matatizo yaliyotokea yatakapopelekwa kwenye Kamati ya Utendaji ambayo ndio yenye mamlaka ya mwisho.”

“Wamesema wataitisha kikao Julai 4, 2017 (Jumanne ijayo). Matatizo yalikuwa mengi, kuna watu wamekatakata majina kwa uonevu tu. Taratibu zinataka kupindishwa kwa sababu ya kutaka kupendelea watu fulani.”

“Mimi siwezi kuwa sehemu ya kamati ambayo ipo namna hii, kwa hiyo nashukuru barua yangu imepokelewa na imefanyiwa kazi kama nilivyokuwa nimetaraji.”

Julai 4, 2017 baada ya Kamati ya Utendaji kukaa na kujadili mgogoro huo uamuzi wa kuendelea au kutoendelea kwa mchakato wa uchaguzi huo utatolewa.

Kaimu Katibu Mkuu wa TFF Salum Madadi amesema amekubali ombi la Mwenyekiti wa Kamati ya Uchaguzi kuhusu kusimamisha mchakato wa uchaguzi wa TFF kutokana na kutofautiana kwa wajumbe wa kamati hiyo.

Madadi amesema Kamati ya Utendaji ya TFF itakutana Jumanne Julai 4, 2017 kwa ajili ya kulitolea uamuzi suala hilo.

“Kumetokea mgawanyiko ndani ya kamati yetu ya uchaguzi, Mwenyekiti wa kamati ya uchaguzi ametuandikia barua na tumeshauriana naye kusitisha mchakato wa uchaguzi na tumeitisha kikao cha dharura cha kamati ya utendaji ya TFF tarehe 4 Julai, 2017 saa 7:00 mchana.”

“Baada ya kikao cha dharura cha Kamati ya Utendaji tutakuwa na cha kusema kuhusu mchakato wa uchaguzi,” alisema Madadi.

Read More

Nyota wa Barcelona Lionel Messi na mchumba wake Antonella Roccuzzo wamefunga ndoa na kufanya sherehe ya matanuzi huko Rosario Ijumaa usiku.

Wanandoa hao walionyesha upendo wao wa dhati mbele ya camera wakibusiana baada ya kufunga ndoa huku wakikatiza juu ya zulia jekundu.

        Lionel Messi akiwa mwenye furaha huku akishikana mkono na mkewe Antonella Roccuzzo

Xavi Alonso, Cesc Fabregas na Carlos Puyol na wenza wao wakihudhuria sherehe ya harusi ya Lionel Messi

                 Luis Surez na mwenza wake naye alikuwa miongoni mwa wageni waalikwa

              Angel Di Maria naye alijitokeza kutoa sapoti kwa Muargentina mwenzake

Samuel Eto'o  ambaye aliwahi kucheza na Messi Barcelona pia alihudhuria harusi ya Lionel Messi

Lionel Messi akionyesha ishara ya dole gumba kuwashukuru wageni waalikwa wakiwemo wachezaji wenzake wa sasa na wazamani wa Barcelona

Read More

Kipa Said Mohammed Nduda , akichupa kuzuia mpira wakati wa mazoezi yanayosimamiwa na Kocha wa Makipa wa Taifa Stars, Patrick Mwangata aliyepiga magoti katika mazoezi yanayofanyika Kituo cha michezo cha Tolip (Tolip Sports City) hapa Alexandria, Misri. 

Taifa Stars inayodhaminiwa na Bia ya Serengeti inayozalishwa na Kampuni ya Bia ya SBL, inajiandaa kucheza na Lesotho Juni 10, 2017 Uwanja wa Taifa, Dar es Salaam kuwania kucheza fainali za Kombe la Mataiafa ya Afrika (AFCON) za mwaka 2019 zitakazofanyika Cameroon.

Kiungo wa pembeni wa Taifa Stars, Simon Msuva akiwa kwenye kasi kuwahi mpira wakati wa mazoezi ya timu hiyo yanayofanyika Kituo cha michezo cha Tolip (Tolip Sports City) hapa Alexandria, Misri.

 

Libero wa Taifa Stars, Erasto Nyoni (katikati) akijitahidi kudhibiti mpira mbele ya washambuliaji wenye njaa ya kufunga, Ibrahim Ajib (kulia) na Abderheman Mussa kabla ya kipa Said Mohammed hajatokea kusaidia wakati wa mazoezi ya timu hiyo yanayofanyika Kituo cha michezo cha Tolip (Tolip Sports City) hapa Alexandria, Misri. 

 Picha na Alfred Lucas wa TFF.

Read More

KAULI YA RAIS JAMAL MALINZI KWA UMMA

MAENDELEO YA TIMU ZA VIJANA. 

Ndugu zangu, leo nimewakaribisheni ili kwa niaba ya Shikisho la Mpira wa Miguu Tanzania (TFF) niweze kutoa shukrani zetu, pongezi na pia kutoa mwelekeo wa timu zetu za vijana kuelekea Fainali za Kombe la Dunia mwaka 2026 (FIFA WORLD CUP 2026). 

 

SHUKRANI. 

Kama tunavyofahamu timu yetu ya vijana umri chini ya miaka 17 ilishiriki kwa mara ya kwanza katika Fainali za Afrika (Afcon U17) nchini Gabon, fainali hizi zilichezwa kuanzia tarehe 14-28 mwezi Mei mwaka huu. 

 

Timu yetu ya Taifa ya vijana umri chini ya miaka 17 Serengeti Boys ilishiriki katika fainali hizi na kutolewa hatua ya makundi. Katika hatua hii ilitoa sare ya 0-0 dhidi ya Mali, ikaifunga Angola bao 2-1 na kutolewa kwa sheria ya uwiano wa matokeo (head to head) baada ya kufungwa bao moja kwa bila na Niger. 

 

Ni jambo la kutia moyo kuwa bingwa wa mashindano haya Mali timu pekee ambayo hawakuweza kuifunga ni Tanzania na timu nyingine zote walizokutana nazo walizifunga ikiwemo na Ghana ambayo Serengeti Boys walitokana nayo sare hapa Dar es salaam. 

Hakika mashindano haya yameonyesha kuwa kumbe Tanzania tunao uwezo mkubwa wa kushindana katika mashindano makubwa. 

Shirikisho la Mpira wa Miguu Tanzania linapenda kutoa shukrani za pekee kwa Mheshimiwa Rais John Pombe Magufuli, Makamu wa Rais Mama Samia Suluhu, Waziri Mkuu Mh Kassim Majaliwa ambao kwa umoja wao walihakikisha timu inawezeshwa kikamilifu na kuwa na nguvu kubwa ya kushindana. 

 

Tunamshukuru sana Mh Dk Harrison Mwakyembe Waziri wa Habari, Utamaduni, Sanaa na Michezo pamoja na watumishi wa Wizara kwa ushirikiano na jitihada kubwa walizozifanya kuhakikisha timu inapata maandalizi mazuri. 

Tunawapa hongera na kuwashukuru wachezaji wa Serengeti Boys kwa jitihada na ukomavu wao katika kipindi cha maandalizi na cha fainali zenyewe. Pongezi nyingi na shukrani kwa benchi la ufundi la timu na uongozi wa timu unaoongozwa na Mjumbe wa Kamati ya Utendaji ya TFF Ndugu Ayoub Nyenzi, Kamati ya Utendaji ya TFF wakati wote ilikuwa karibu naye na ilimpa nguvu sana. Hongera pia kwa wafanyakazi wa TFF waliohakikisha wanaratibu shughuli za timu kwa ufanisi mkubwa. 

TFF inawashukuru sana wajumbe wote wa Kamati ya Uhamasishaji ya Serengeti Boys iliyoongozwa na Bw Charles Hilary. Uhamishaji wao ulikuwa ni mkubwa sana na uliamsha ari ya Watanzania kuhamasika na kushangilia timu. Shukrani sana kwa wadau wote waliochangia timu na shukrani sana kwa waandishi wa habari na wasimamizi wa blogu mbalimbali na ma admin wa makundi mbalimbali ya mitandao waliohamasisha na kuichangia timu. 

 

MPANGO WA BAADAYE WA SERENGETI BOYS. 

Kikosi hiki cha Serengeti Boys kilichoshiriki fainali hizi sasa kimebadilika na kuwa rasmi timu ya Taifa ya vijana umri chini ya miaka 20 NGORONGORO HEROES. Timu hii mwaka kesho itashiriki katika hatua hatua za kufuzu kucheza fainali za Afrika umri chini ya miaka 20 Afcon U20. Fainali hizi zitafanyika mwaka 2019. Benchi la ufundi la timu hii linaandaa program ya maandalizi ya kikosi hiki ambayo itahusisha kambi na mechi za majaribio ndani na nje ya nchi. 

 

FAINALI ZA AFRIKA ZA VIJANA UMRI CHINI YA MIAKA 17(AFCON U17) MWAKA 2019. 

Tanzania itakuwa mwenyeji wa fainali za Afrika za vijana umri chini ya miaka 17 mwaka 2019. Tarehe 28 Mei 2017 baada ya mchezo wa fainali za Afcon U17 Rais wa CAF Bw Ahmed aliikabidhi rasmi Tanzania uenyeji huu kwa njia ya ishara ya kumkabidhi Katibu Mkuu wa TFF Mwesigwa Selestine bendera ya CAF, tukio ambalo lilishuhudiwa na dunia nzima. Tunamshukuru. 

 

Taratibu za kuandaa fainali hizi zitaratibiwa kwa ushirikiano wa karibu kati ya TFF na Wizara ya Habari, Utamaduni, Sanaa, na Michezo. Ni Imani ya Shirikisho kuwa Tanzania itaandaa fainali nzuri na za kihistoria. TFF inatoa rai kwa wadau wote wa mpira wa miguu Tanzania tushirikiane ili tuzitumie fainali hizi kujenga jina la nchi yetu kimichezo, kiutamaduni, kiutalii na kiuchumi. 

Kwa kuwa Tanzania itakuwa ni mwenyeji wa mashindano haya moja kwa moja imefaulu kucheza fainali za mashindano, hivyo Tanzania tutacheza fainali hizi za Afrika mara mbili mfululizo, jitihada zitafanyika kuhakikisha kombe hili linabakia nyumbani. 

Maandalizi ya timu itakayoshiriki fainali hizi yalianza mwaka 2015 ambapo TFF iliandaa mashindano ya kitaifa ya vijana umri chini ya miaka 13 (U13). Katika awamu ya kwanza ya maandalizi haya Vijana 22 bora waliopatikana kwenye mashindano haya walikusanywa pamoja na kwa ruhusa ya wazazi wao walipatiwa shule ya kusoma pamoja ambapo wanapata fursa ya kusoma na kufanya mazoezi ya pamoja. 

Shule hii iko mjini Mwanza. Awamu ya pili itakayoanza mwezi Julai itahusisha vijana hawa kuongeza kasi ya mazoezi na hivyo itabidi wasome katika shule iliyokaribu na benchi la ufundi la timu hii ambayo sasa ndiyo rasmi SERENGETI BOYS. Shule hii tayari imekwisha patikana hapa Dar es salaam na taratibu za masomo yao zinaandaliwa. 

Tunawashukuru wazazi wa watoto hawa kwa kutoa ushirikiano kwetu, pia tunaishukuru shule ambayo wamekuwa wakisomea kwa ushirikiano wao. Mwezi Julai timu hii itacheza mechi mbili za majaribio za kimataifa. Imani ya TFF ni kuwa tutajenga kikosi imara cha Serengeti Boys mpya ambacho kitatoa ushindani na kunyakua kombe la Afcon U17 mwaka 2019. 

 

MFUKO WA MAENDELEO YA MPIRA WA MIGUU 

(TFF FOOTBALL DEVELOPMENT FUND). 

 

Mfuko huu ulianzishwa mahsusi na Mkutano Mkuu wa TFF mwaka 2015 kwa ajili ya kukusanya rasilimali za kuendeshea program za mpira wa vijana na wanawake. Mfuko huu unajiendesha wenyewe chini ya Bodi yake inayoongozwa na Mwenyekiti Bw. Tido Mhando. Hivi sasa mfuko huu unaandaa mpango kazi wa miaka kumi 2017-2027 ambao utahakikisha kuwa kuna rasilimali za kutosha za kuhakikisha: 

 

1. Timu zetu za Taifa za vijana Serengeti Boys,Ngorongoro Heroes na Kilimanjaro Warriors zinaandaliwa vyema. 

 

2. Timu yetu ya Taifa ya wanawake Twiga Stars inaandaliwa na inafuzu kucheza fainali za Afrika za Wanawake mwaka 2018 huko Ghana na hatimae kufuzu kucheza Fainali za Kombe la Dunia mwaka 2019 huko Ufaransa. 

Imani ya Shirikisho ni kuwa kutokana na jitihada hizi za kujenga vikosi imara vya vijana vya Serengeti Boys iliyoshiriki fainali za Afrika huko Gabon, Serengeti Boys itakayoshiriki Fainali za Vijana za Afrika nchini Tanzania mwaka 2019 na Kilimanjaro Warriors (U23) itakayoshiriki hatua ya kufuzu kucheza Olimpiki Tokyo mwaka 2020 kwa pamoja kuanzia mwaka 2020 kikosi kipya cha Taifa (Taifa stars) kitaanza kuonyesha uhalisia wa sura yake, kitalelewa na kitakomaa tayari kushiriki hatua za kufuzu kucheza Fainali za Kombe la Dunia za mwaka 2026, hatua hizi za kufuzu kucheza hizi fainali zitaanza mwaka 2024. Shime Watanzania tuunge mkono jitihada hizi, kwa pamoja inawezekana, fainali za Gabon zimetudhibitishia hivyo! 

Mungu ibariki Tanzania. 

Mungu ibariki timu zetu zote zaTaifa. 

Ahsanteni sana. 

 

Jamal Malinzi 

RAIS WA TFF 

DAR ES SALAAM 

02 Juni 2017.

Read More

HANSPOPE AFUTA UAMUZI WA KUJIUZULU SIMBA SC

Mwenyekiti wa Kamati ya Usajili ya Simba, Zacharia Hanspope amerudi kundini Simba baada ya kufuta uamuzi wake wa kujiuzulu

Mkuu wa Kitengo cha Habari na Mawasiliano wa Simba, Haji Manara amethibitisha suala hilo na kusema Hanspope amerudi kundini baada ya kujiuzulu kutokana na sakata liloendelea ndani ya Simba.

"Rasmi Hanspope arejea kundini, afuta uamuzi wake wa kujiuzulu na ndio maana 'fans' wetu nawaomba mtulie hakuna kitakachoharibika, ni upepo mbaya ulipita na sasa umetulia, karibu tena kamanda Pope" alisema Haji Manara

Read More

AFCON U-17::SERENGETI BOYS KULIANZISHA DHIDI YA MALI LEO

Hatimaye siku iliyokuwa imesubiriwa kwa hamu na Watanzania ya kuishuhudia timu yao ya Taifa ya vijana chini ya umri wa miaka 17, Serengeti Boys imefika ambapo, leo Jumatatu inafungua pazia lake katika mashindano ya Kombe la Afrika kwa Vijana, kwa kumenyana na Mali katika michuano hiyo inayofanyika nchini Gabon.

Aidha, Serengeti Boys imepangwa katika Kundi B, ambapo katika kundi hilo iko pamoja na timu nyingine za Angola na Niger ambazo nazo zitakuwa kibaruani leo.

Kocha Mkuu wa timu hiyo, Bakari Shime amesema kuwa kikosi cha Serengeti Boys kiko vizuri na kimejiandaa vya kutosha kuwakabili vijana wa Mali kwenye mchezo huo wa kwanza.

“Kikosi kipo vizuri na tumejipanga kuikabili vilivyo timu ya Mali kwani tunataka kuwafurahisha Watanzania kwa kutowaangusha na naomba wazidi kutuombea,” amesema Bakari Shime.

Timu hiyo ya Taifa ya vijana pamoja na maandalizi mazuri lakini imepata pigo baada ya nahodha, Abd Makamba kuvunjika mguu hivyo hataweza kushiriki mashindano yote.

"Ni jambo la kusikitisha kidogo kwamba Nahodha wetu Issa Abdi Makamba alipata mpasuko wa mguu juzi mazoezini kwa bahati mbaya akiwa pekee yake kabisa,Kwa mujibu wa taarifa kutoka kwa madaktari wangu wamesema kwamba hatoweza kushiriki mashindano haya na jina lake tumeliondoa katika mashindano tayari nafasi yake imeshachukuliwa na mtu mwingine kwa sababu tulikuwa na wachezaji wa akiba". Alisema Shime na kuongeza;
 

“Imekuwa bahati mbaya kwetu, bahati mbaya kwa Issa Abdi amepambana kwa miaka miwili kuiongoza hii timu kuhakikisha inafikia hapa ambapo imefika lakini tunaamini mchango wake ni mkubwa sana na kwa sababu bado yupo ndani ya kikosi anaendelea na majukumu yake kama Kapteni kuhamasisha na kuongoza wenzake bado tunampa pole Issa Abdi tunaamini kabisa wachezaji wanatakiwa kupigana kwaajili yake”.

Read More

EUROPA::MAN UNITED YATINGA FAINALI SASA USO KWA USO NA AJAX

Manchester United imenusurika tishio la dakika za mwisho na kuwatoa wageni Celta Vigo na kufanikiwa kukata tiketi ya kutinga fainali ya Ligi ya Uropa dhidi ya Ajax.

Ikiongoza kwa goli 1-0 katika mchezo wa kwanza, United ilianza kwa kuumiliki mchezo wa jana na kufunga goli la kichwa kupitia kwa Marouane Fellaini kupitia pande la Marcus Rashford.

Lakini Celta, iliyokuwa ikihitaji kufunga magoli mawili, ilisawazisha goli hilo kupitia kwa mchezaji wao Facundo Roncaglia na kuufanya mchezo huo kwa wa roho juu.

Katika mchezo huo mchezaji wa Manchester United Eric Bailly na Roncaglia walitolewa nje kwa kupigana huku wenyeji wakigangamala na kutinga fainali.

                                              Marouane Fellaini akifunga goli kwa mpira wa kichwa

             Mpira uliopigwa na mchezaji Facundo Roncaglia ukiwa umetinga wavuni

                              Fellaini akimzuia Eric Bailly aliyempiga ngumi John Guidetti

Read More

EUROPA:: LICHA YA KUFUNGWA UGENINI,AJAX YATINGA FAINALI

Timu ya Ajax imejikuta ikipata wakati mgumu baada ya Lyon kutaka kulipa kisasi nchini Ufaransa katika kujaribu kutinga fainali ya Ligi ya Uropa kwa mara ya kwanza tangu mwaka 1996.

Katika mchezo wa jana Ajax ilipata goli la kwanza kupitia kwa Kasper Dolberg na kufanya matokeo ya jumla kuwa magoli 5-1.

Lakini Alexandre Lacazette aliifungia Lyon magoli mawili kabla ya kumalizika kipindi cha kwanza na kisha Rachid Ghezzal kufunga goli la tatu katika dakika ya 81.

                                     Alexandre Lacazette akichezewa rafu katika eneo la penati

               Alexandre Lacazette akiwa ameubeba mpira baada ya kufunga kiufundi penati

Read More

MASHINDANO YA KUMBUKUMBU YA HABIBU MNDEME MAARUFU KAMA HABIBU CUP YAMALIZIKA WILAYANI MWANGA

Wageni wa meza kuu wakifurahia jambo wakati wa kuanza kwa fainali ya mashindano ya Habibu cup katika uwanja wa Cleopa Msuya wilayani Mwanga.

Kikosi cha timu ya Kifaru kikipasha misuli joto.

Kikosi cha timu ya Nyerere kikipasha misuli joto.

Mgeni rasmi katika mchezo wa fainali za Mashindano ya Habibu Cup ,Thabit Mndeme akisalimiana na wachezaji wa timu ya Nyerere.

Mgeni rasmi katika mchezo wa fainali za Mashindano ya Habibu Cup ,Thabit Mndeme akisalimiana na wachezaji wa timu ya Kifaru.

Mgeni rasmi katika mchezo wa fainali kati ya timu za sekondari za Nyerere na sekondari ya Kifaru,Thabit Mndeme akizungumza kabla ya kuanza kwa mchezo wa fainali baina ya timu hizo mbili.

Kikundi cha ushangiliaji cha timu ya Nyerere .

Kikundi cha ushangiliaji cha timu ya Kifaru.

Sehemu ya hekaheka katika mchezo huo wa fainali.

Mchezaji wa timu ya Sekondari ya Kifaru akipiga penati iliyopelekea ushindi wa jumla ya bao 5 kwa 3 kwa timu ya Kifaru katika mchezoo wa fainali dhidi ya timu ya sekondari ya Nyerere .

Baadhi ya mashabiki walijitokeza kushuhudia michezo ya fainali katika mashindano hayo.

Mgeni rasmi Zuhura Mndeme akielekea katika uwanja wa mchezo wa Netiboli kwa ajili ya ufunguzi ya kuanzisha fainali ya mchezo huo kati ya timu ya Green Bird Collage na Sekondari ya Usangi Girls Day.

Timu ya Netiboli ya Shule ya sekondari ya Usangi Girls Day

Timu ya Green Bird Collage.

Mgeni rasmi kwa upande wa mchezo wa Netiboli ,Zuhura Mndeme akisalimiana na wachezaji wa timu ya Green Bird Collage.

Mgeni rasmi kwa upande wa Netiboli,Zuhura Mndeme akisalimiana na wachezaji wa timu ya Sekondari ya Usangi Girls Day.

Mwamuzi wa mchezo huo wa fainali akimkaribisha mgeni rasmi Zuhura Mndeme kufungua rasmi mchezo huo wa fainali.

Mgeni Rasmi Zuhura Mndeme akirusha mpira kwenye mlingoti wa goli wakati wa ufunguzi rasmi wa mchezo wa faiali ya Netiboli.

Mchezo wa fainali ukiendelea baina ya timu ya Green Bird Collage na Sekondari ya Usangi Girls Day mchezo uliomalizika kwa timu ya Green Bird kutangazwa malkia mpya wa mchezo huo baada ya kushinda kwa point 17 kwa 15 za Usangi Girls.

Mshindi wa kwanza katika mbio za Habibu Marathon Km 21 Musa Hassan akipokelewa baada ya kuhitimisha mbio katika uwanja wa Cleopa Msuya wilayani Mwanga.

Mshindi wa Pili katika Mbio za Habibu Marathon Peter Michael akihitimisha mbio hizo katika uwanja wa Cleopa Msuya.

Washindi Sita bora katika mbio za Habibu Marathon 2017 wakiwa katika picha ya pamoja baada ya kumalizika kwa mbio hizo.

Mgeni rasmi katika mashindano ya Habibu Cup ,Thabit Mndeme akikabidhi kombe la ubingwa wa mashindano hayo kwa Nahodha wa timu ya soka ya Kifaru ,Zuber Zuber mara bada ya timu hiyo kujinyakulia ubingwa wa mashidano hayo kwa mara ya pili mfululizo.

Wachezaji wa timu ya soka ya Kifaru wakishangilia mara baada ya kukabidhiwa Kombe la ubingwa.

Mgeni rasmi katika mashindano ya kumbukumbu ya Habibu Mndeme ,Thabiti Mndeme akimkabidhi kikombe cha umalkia wa mchezo wa netiboli wa timu ya Green Bird Collage .

Mgeni rasmi katika mashindano ya kumbukumbu ya Habibu Mndeme ,Thabiti Mndeme akimvisha medali mshindi wa kwanza wa mbio za Habibu Marathon Km 21 ,Musa Hassan.

Na Dixon Busagaga wa Globu ya Jamii Kanda ya Kaskazini.

Read More